Eccu u testu di a cunfarenza stampa di u Riacquistu fatta in Santa Ghjulia u 7 sittembri

                          

  Cunfarenza stampa :   07 09 09

A scelta ecunomica di u « tuttu turisimu » comu logica di sviluppu cumunali ha pruvucatu, fra altri cunsiquenzi a spiculazzioni fundaria incu a vendita prugrissiva di a noscia tarra, è u scunvuliamentu  di i nosci loca incu un’urbanizzazioni senza limiti .

Ricusemu d’essa i spittatori passivi di u nosciu spussessu , ricusemu d’essa sclusi da i nosci loca.

Comu Punta d’Oru , Speroni, è tant’altri ,Santa Ghjulia hè un esempiu d’issu spussessu e d’issa sclusioni.  Pocu a pocu, i corsi diventani minuritari, inchjuvati tra tutti issi risidenzi e issi piaghji chi diventani loca privati.

Di pettu a issa situazzioni,  si senti pocu a mirria, lachendu pa’ esempiu l’accessi cumunali accaparrati pa’ via di una strategia d’intaressi particulari ch’ùn hani nudda a veda cu u nosciu bé cummunu…

Da qui a pocu, sarani privati l’accessi pubblichi à a spiaghja, è i parcheghji. Vali a dì chi quiddi di u nosciu rughjonu chi circarani à prufittà  di u mari sarani pochi è micca

Induva so i prumessi di a municipalità pà a gestioni cumunali di u locu ?

Vulemu avé i mezzi di pudé ci spustà com’idda ci pari indé no !

A logica di u spussessu un hè micca una fatalità ! Accittala voli dì chi simu dighjà capi calatu pronti a facci lampà fora da i nosci loca !!!

U RIACQUISTU ramenta chi a scelta di u sviluppu ecunomicu s’appoghja dinò nant’a un puntu maiori chi hè chi i purtivichjacci ni sighini principali attori, in u rispettu di u bè cumunu e di i libartà individuali di ogni corsu à campà e spustassi indù voli.

Un ci lacchemu  micca metta fora da i nosci loca , ritruvemu i nosci stradi è i nosci spiaghji.