DISCORSU DI I PATRIOTTI GHJUDICATI U 3 DI

GHJUGNU 2009

U 21 nuvembri eramu cunvucati à u tribunali d’Aiacciu, accusati d’ essa intruti pà forza annant’à una prupriità privata,d’avé minacciatu è custrettu l’aghjenti, è     cummissu viulenzi.

U 21 nuvembri ùn semu micca intruti  in u tribunali parchi era inturniatu da i forzi di puliza è avemu ricusatu di participà à un prucessu in issi cundizioni.

Senza avvucati, senza accusati, i ghjudici hani quantunqua prununciatu una cundanna : 500 euro par omu pà avè fattu « prova d’arruganza » pusendu annant’à i cariconi di un famosu attori amicu di 2 prisidenti, è pà avé maltratattu un ghjaddu in farru .

   Ricusemu issa cundanna è semu qui pà spiigà à u nosciu populu i veri raghjoni d’issa missa in causa è i raghjoni di a noscia prisenza u 30 austu in a risidenza di ch’iddi chjamani «  Punta d’Oru » dopu à avé fattu  un’accolta dannanzi à a casa cummuna in Portivecchju.

Dopu a ‘ssa accolta, semu stati imbruttitti pubblicamenti da omini pulitichi, da certi ministri francesi a u prisidenti di l’assemblea di Corsica.Issu prisidenti, amicu di l’attori Clavier e porta voci di quissu’ultimu ha dichjaratu a i media chi avemu sciapatu un la sapemu chi, ch’emu parlatu mali cu certi impiegati, un la sapemu quali, ch’emu imbruttitu linzoli ,un la sapemu induva erani tesi o missi, ch’emu arrubatu vinu in una carciara ch’un semu briacconi e di avè pulsatu e lampatu in acqua un ghjaddu ch’un avemu mai vistu un ghjaddinaghju culà…

A noscia azioni era chjaramenti pulitica : semu passati pa’ issa risidenza par muscià à u nosciu populu un esempiu di ciò chi u PADDUC voli fà di a  Corsica… Semu passati annantu à una strada d’accessu pubblicu à u mari, senza viulenzi è senza minacci . ma si sa bè chi : « A chi t’ha dinaru e amicizia, torcia u nasu a a ghjustizia !!! »

E OGHJI ISSU PRUCESSU HE PULITICU !

 Hè puliticu parchi hè a vulintà di quiddi chi t’ani u puteri mischiati cu quiddi chi t’ani i soldi chi circani a imbrutta u nosciu missaghju e à fà taccia a noscia voci di a sfarenza.

Un’ avemu nudda a spiegavi parchi ùn ricunuscimu micca issu tribunali ch’iddu rapprisenta  a Francia. Un lu ricuniscimu parchi rapprisenta dinò a vulintà di u guvernu francesu di ùn piddà micca in contu a rialtà di a cumunità corsa.

Hè puliticu parchi Hè quiddu di l’aghjenti chi ricusanu ch’iddu sighi missu in ballu un prughjettu dittu ecunomicu e chi ha da taddà a pezzi e pezzi tarri e tarreni pa’ logichi di spussessu fundariu e finanziaru. Hè quiddu d’aghjenti  d’issu paesu chi pruponini un alternativa a ‘ssu sistema di spiculazioni e di prufitti mittendu à u centru di u prughjettu di sviluppu ecunomicu suciali e culturali u populu corsu e a so identità.

Se no semu chivi hè parchi no dimu chjaramenti chi no vulemu che a noscia tarra,  a noscia lingua a noscia cultura campessini. E parchi rivindichemu u nosciu drittu a spannaci cu a noscia identità. E parchi luttemu pa’ u drittu a avè un travaddu assicuratu, un alloghju sicuru, e una paga cunvinevuli.

Semu chivi parchi semu accant’a quiddi chi da qui a pocu ùn avarani  piu nudda.

Semu chivi parchi luttemu pà i dritti naziunali di un populu di u mari tarréniu cunquistatu piu di dui seculi fà da un armata straniera, l’armata francesa. Semu chivi parchi vulemu rimetta comu Nazioni u Populu Corsu in cori di a custruzzioni auropea  e mediterrania.

Semu chivi parchi semu naziunali corsi e indipendentisti.

Hè puliticu parchi hè quiddu di l’aghjenti ch’un volini di issu PADDUC chi farà andà  l’isula di Corsica à a malavia cu a so logica d’ecunumia di i risidenzi sicundarii e di  turisimu assolutu.

Chi hè issu prughjettu di PADDUC ?

Hè un prughjettu riflituttu e custruitu  altrò chi in Corsica. Hè un prughjettu fattu pa’ uni pochi di gruppi di parsoni immischiati incu  a pulitica e l’affari e chi da Portivechju sin’ à Calvi s’arranghjani tutti insembu pa’ i so cumbriculi finanziarii.

U so scopu ? Hé di cuntinuà cio chi oghji poni prublema nant’a i spondi di u circondu mediteraniu : l’accrisciamentu turisticu e immubiliaru.

Issu PADDUC ùn laca a piazza da u puntu di vistu ecunomicu à l’attività maiori comu a splutazzioni naturali di a tarra pà via di l’agricultura è l’allevu. Un laca a piazza à una pulitica sana di a furesta. Un dici nudda nant’a a pussibilità di metta in ballu una logica di pruduzzioni glubali agru – alimentari e a pussibilità di pruducia un’offra chi rispundarà a a dumanda. Un dici nudda nant’ à l’urganisazzioni di a pesca e di a so specificità. Un dici nudda nantu a prughjezzioni di l’impresi di i novi tecnulugii nant’à u tarritoriu. Un pidda in contu a maestria di i risorzi naturali comu l’acqua, u soli, u ventu è l’urganizzazioni di a strategia di a pruduzioni è di a cunsummazioni di l’energia. Un mintulighja mancu un codici di l’invistimenti pà impidiscia a disurganisazioni e u spussessu fundariu. Un pidda in cunsidirazzioni a rialtà umana e suciali di i paesi e i pievi. Un rimetti micca à u  centru di l’ecunumia a cultura e a lingua corsa comu radichi naturali e suciali pà avanzà.

Issu PADDUC ùn ricunosci chi una certa manera di spluttà un turisimu appughjendusi nant’a una logica finanziara di l’immobiliariu e di a spiculazioni fundaria, lachendu apposta metta in ballu un prughjettu tremendu di risidenzii sicundarii.

Issu PADDUC farà di a Corsica , una riserva d’indiani chi svagarani l’aghjenti d’altrò comu hani dighjà cuminciatu uni pochi com’ u sgiò Clavier e i so amichi…

E oghji i so ridattori circani à sbaglià l’aghjenti parlendu  d’ecunumia « prisenziali » piuttostu chi d’ecunumia « risindenziali ». Hani capitu chi u prughjettu un passaia micca, ma pà difenda a so filosofia di l’intaressi privati provani a cambià i ridazzioni senza cambià i rialtà di a finanza… Piddani l’aghjenti  pà tonti, ignuranti parchi culunizzati !!!

No pinsemu chi ci voli un altru pianu di sviluppu pà a Corsica. Un pianu chi s’appoghja nant’a un sviluppu durabili chi rispetta l’equilibri naturali di l’isula. E prupunimu com’ andatura di riflissioni una cumplementarità di i spazii è di a pruduzzioni di tutti i settori ecunomichi specifichi di i rughjoni di Corsica.

E supratuttu un ci po essa sviluppu s’idd’ùn c’è micca populu ricunisciutu in i so dritti. Di fatti un primu passu – a cittadinanza paisana corsa – po essa francatu.

Ma oghji ch’hè oghji, vidimu , e a prova n’è a noscia prisenza in  issu tribunali , ch’idd’hè  l’ordini stabilitu di a finanza intarnaziunali è i so gruppi di prissioni chi facini cio chi li pari.

Allora a vi dimu franc’ e chjara : Ùn ci pudareti mai fà  sta bassi,chì a noscia voci ha dighjà  francatu i vosci muri e s’hé sparsa ind’é u populu, divintendu pupulari pà di « innò a issu Padduc !!! »

 A noscia ditirminazzioni à sbuccà cu tutti quiddi chi pensani a Corsica oghji pà dumani à una vera e sana soluzzioni pulitica un cambiarà.

 Vi ramintemu chi ritti di pettu a vo ùn accittemu di essa ghjudicati che da u Populu Corsu è  a so lotta.

E nanzi di compia, di pettu a vo, dimmu una volta di più tutta a noscia sulidarità incu tutti quiddi chi soffrini dapoi parechji anni in i prighjò  di a ghjustizia francesa.

AVVIA A LIBARTA !

AVVIA A NAZIONI CORSA !

  Articulu "Corse Matin" : 04 06 09

 Affaire Clavier : L'avocat général hausse le ton...et la peine

riassuntu è intervista d'O Sauli innanzi à u prucessu :

http://www.europe1.fr/Info/Actualite-France/Justice/Jardin-de-Clavier-occupe-1-500-euros-requis/(gid)/226747


http://www.leparisien.fr/abo-faits-divers/une-rocambolesque-audience-pour-l-affaire-clavier-04-06-2009-536339.php