Cunfarenza stampa
( 05 02 2010 )
Metta à u centru di l’andatura pulitica di cunvergenza a scelta patriottica era u scopu , a l’epica di l’ultimi alizioni muncipali di Portivecchju,di tutti quiddi chi vuliani custruiscia una
forza pulitica addunita contr’à u clanisimu.
A l’epica, quiddi chi oghji parlani di « naziunalisimu muderatu » un vuliani accittà a noscia presenza a fianc’à iddi. A ricusaiani prifirindu altri currenti pulitichi ditti prugressisti. Eppuri semu attacati à a dimucrazia e u bé cummunu.
L’asempiu di l’alizzioni municipali di Portivecchju ha quantunqua musciatu ch’asistia a pussibilità di batta a maiurità liberali in piazza si tutti i forzi patriotichi si mittiani insembu nant’à punti maiori ch’iddi sighini pulitichi, ecunomichi, suciali e culturali. E pudiani, una volta chi u cori patrioticu era custituitu, circà d’ accodda aghjenti d’altrò.
L’andatura di U Riacquistu di Portivecchju hè sempri stata di favurizzà ‘ssa scelta patriotica, in u rispettu di tutti i sensibilità.
U Riacquistu di Portivecchju ha dunqua suvitatu i vulintà naziunali di metta in ballu, pà l’alizzioni tarrituriali di marzu 2010, un’andatura appughjata nant’a cunvergenza patriotica e i rivindicazzioni d’oghji chi so :
- A lingua e a cultura corsa.
- U fundariu.
- U drittu pà ognunu à u travaddu, à l’alloghju, à a pruprietà, e à a dignità.
- U svillupu ecunomicu e durevuli.
- A cittadinanza corsa.
- A Liberazzioni di i patriotti incarcirati.
- Un si pò micca staccà l’avvena di Portivecchju di ciò chi si passa in Corsica.
Certi, malgradu a pruposta di un’andatura cummuna e a pussibilità di essa a prima forza di u paesu, essendu adduniti, ani prifiritu metta da cantu ,in’ssa cunghjutura, u patriotisimu corsu. Issa dicisioni t’ha i so limiti : un pirmittarà mai a i naziunali di essa una forza pulitica di prima impurtanza. L’emu dighjà vissutu in Portivecchju.
Pà contu nosciu, circaremu sempri d’ appughjà i vulintà di tutti quiddi chi circani à dà à u patriotisimu a manera piu forti di sprimasi e di vincia, musciendu a so energia d’upponasi à u suttu svillupu ecunomicu, à a pricarità suciali, à a perdita di l’usu di a lingua in a vita di tutti i ghjorni e di i valori di a noscia cultura di fratiddenza e di sulidarità, à u spussessu di u fundariu e di i nosci casi, e musciendu dinò a so maturità di custruzzioni di un altr’andà mittindu à u centru di u so prughjettu l’omu e a donna corsa, e tutti quiddi chi si ricunoscini in u nosciu populu.
U
Riacquistu di Portivecchju chjama tutti quiddi chi l’ani sustinutu in Portivecchju ,à aiutà incu u so votu a dimarchja di quiddi chi provani sempri d’addunì i patriotti corsi pà una vera alternativa contr’à u sistemu di u clanisimu, di u spussessu, e di a finanza intarnaziunali.
